SANTUTXUKO JAIAK ETA GAZTE MUGIMENDUA

SANTUTXUKO JAIAK ETA GAZTE MUGIMENDUA

Jurgi Arrietari elkarrizketatu dugu, 23 urteko santutxuarra. Kirikiño ikastolan ikasi zuen, Gaztedi Dantza taldeko kidea da txikitatik eta badira urte dezente Santutxuko gazte Asanbladan parte hartzen duela.

Noiz hasi zinen Santutxuko jaietan parte hartzen?

Bada, txikitatik Gaztedi Dantza taldean aritu izan naiz eta Gaztediko nagusien taldean sartzerakoan ardurak hartzen ditugu eta horietako bat jaietan txosnak eta ekintzetan parte hartzea da. Horrela, hasi nintzen. Gerora, gazte Asanbladan sartu nintzen eta horren bitartez ere jaien antolakuntzan aritu naiz.

Gazte Asanbladan ibili zinen?  Zergatik sartu zinen hor? Zer lan egin duzu?

Bada, jaiekin lotuta Gazte Asanbladak jai eredu alternatiboa, herrikoia, euskalduna, parte hartzailea, auzoarentzat egina eta auzotarrak parte hartzera animatuko dituena bultzatzen du. Eredu horrek animatu ninduen bertan parte hartzera.

Jai Euskaldunak aipatu dituzu. Zure ustez jaietan euskararen presentzia bermatuta dago?

Bai, gutxienez saiatu egiten gara. Euskararen presentzia bermatuta dago, ekintzak euskaraz dira, kartelak ere bai… jaien antolakuntzan aritzen garen eragileak horretaz arduratzen gara. Beste gauza bat da jendeak euskaraz hitz egitea ala ez; baina guk ezin dugu inor behartu euskaraz hitz egitera.

Zelan ikusten duzu gazte mugimendua?

Urte askotan nahiko potentea izan da, baina azkenengo urteetan gainbehera doa. Izan ere, egungo gazteek bestelako betebeharrak dituzte, edo ez dute konpromisorik hartu nahi, edo aisialdia beste gauza batzuetan pasa nahi dute. Adibidez, aurten gazteen bi txosna elkartu egin behar izan dira, ez dagoelako nahikoa jende txandak egiteko. Hori dela eta,  egun hausnarketa  egiten ari gara. Gazte antolakundeak gazteen konpartsa bat sortu nahi du, siglen menpe eta politikatik at egongo dena. Gazte konpartsa horren helburua jai eta hainbat dinamika bultzatzea izango da, jai eredu alternatiboa, euskalduna, kulturala eta batez ere parte hartzailea izango dena, alegia. Horrela, indarra eman nahi zaio talde horren iraunkortasunari, izan ere, jende desberdina bilduko delako eta auzoarengatik zerbait egitea izango da helburu.

Jaiak alde batera utzita, Kirikiñon ikasi duzu; zergatik etorri zara euskaltegira, euskaraz ondo moldatzen bazara?

Bada, magisteritza ikasi nuen, karrera amaitu nuen eta EGA ez nuen gainditu. Beraz, lanerako baldintzatua nago, ziurtagiri bat behar dudalako. Horregatik, etorri naiz prestatzera.

GORA JAI HERRIKOIAK!!!